Lang isch s här

I dänke gärn a früecher zrügg:

A Stadtbach, a di roti Brügg,

A d Tram,wo d Lüt drinn vis-à-vis

Uf länge Holzbänk gsässe sy.

A ds "Rohr", wo d Meitschi sech hei gmüpft,

We d Gymeler hei ds Chäppi glüpft;

A Hossme-Rupf u ds Bon Marché,

A Milchmaa, wo me denn het gseh.

A Märit vorem Waisehuus

Mit Färech, wo s het grunzet druus;

A d Fuerwärch, wo Tag uus, Tag y

Mit Ross desume gfahre sy.

Dra dänke tuen i bsunders gärn,

Wi s schön isch gsi im alte Bärn,

Wo alli no derzyt hei gha

Für z lachen u für s luschtig z ha!

Der Stoub, wo denn derhär isch cho,

Het niemerem der Aate gno,

Will keni Abgas voller Blei

Us Outouspüff gstunke hei!

Béatrice Schürch-Schmidt,
1916 - 2010
Berner Schriftstellerin


"Rohr": ds Rohr ab ga:
Die vier Hauptgassen (Spital-, Markt-, Kram- und Gerechtigkeitsgasse der Berner Innenstadt von der Heiliggeistkirche bis zur Nydeggbrücke; durch die Lauben in Bern in Richtung Bärengraben hinunter gehen